Deskribapena
Eiderrek nota txarrak atera ditu eskolan. Amak zigorra jarri dio: udalekurik gabe, berarekin igaro beharko du uda Arabako herri txiki batean, han daukaten etxean. Herrian Blanca bizi da, Eiderren lagunik handiena. Neska arduratsua, ikasle ona eta lagun ezin hobea da. Uda horretan, ordea, arraro dago Blanca. Lagun guztiengandik iheska dabil, eta Eiderri ere ez dio kasurik egiten.
Eiderren amak, alaba aspertuta eta triste ikusita, Bilbon bizi diren ilobak, Julen eta Aitor, gonbidatu ditu herrira. Hiru gazteen artean Blancari benetan gertatzen zaiona argitu beharko dute: sare sozialetan morroi arraro bat ezagutu du, misteriotsua eta batere asmo garbirik ez duena. Morroi iluna sare sozialetan ezkutatzen da, nor den agertu gabe, eta Blanca engainatua dauka. Adiskidetasunak zenbat balio duen deskubrituko dute Eiderrek eta Blancak, nahiz eta beti ez den erraza lagun bati laguntzea.
